Inskripzioak

Jaiotza-inskripzioa

Aurrez aurre izapidetu

• Zer behar duzu
• Nork egin dezake
• Noiz eta non eskatu
• Informazio gehiago
• Kasu bereziak
• Ohiko galderak

Zer behar duzu?

Inskripzioa haurra jaio den ospitaletik egiten baduzu, hurrengo dokumentazioa aurkeztu behar duzu:

1. Guraso bien NAN, NIE edo pasaportea, eta eskatzailearena -azken hori gurasoa ez bada-.
2. Gurasoak ezkonduta bazaudete, ezkontza-ziurtagiria aurkeztu behar duzue; bestela, inprimaki ofizialean ezkonduta zaudetela egiaztatzeko ziurtagiria sinatu beharko duzue. Ezkongabeak bazarete, inprimaki ofizialean gurasotasun ziurtagiria sinatu beharko duzue.

Haurrak Euskadiko ospitale publiko guztietatik inskribatu daitezke. Horrela jasota dator uztailaren 13ko 19/2015 Legean, Justizia Administrazioaren eta Erregistro Zibilaren eremuko administrazioa eraberritzeko neurriei buruzkoan .

Haurra Erregistro Zibilean edo Bake Epaitegian inskribatzeko aukera ere badago. Kasu horretan, bi aukera daude:

- Haurra jaio den udalerrian bertan erregistratu nahi baduzu, dokumentu hauek aurkeztu beharko dituzu: Mediku-ziurtagiria, edo emaginarena, edo erditzean lagundu duen osasun-laguntzaile teknikoarena. Bananduta bazaude eta inskribatu nahi duzun haurraren aitarekin ezkondu ez bazara, aipatutako dokumentuez gain, dibortzio-epaia ere aurkeztu behar duzu.

- Haurra bi gurasoak erroldatuta zaudeten udalerrian inskribatzen baduzu, guraso biak elkarrekin bertaratu beharko zarete eta, aipatutako dokumentuez gain, beste hauek ere aurkeztu beharko dituzue:

• Bi gurasoen errolda-ziurtagiria.
• Jaioberriaren inskripziorik egin ez dela dioen klinikaren edo ospitalearen ziurtagiria.

Nork egin dezake

Inskripzioa ospitaletik egiten bada, aitak, amak edo gurasoek ezean, gertuko senide batek edo beste norbaitek egin dezake; beti ere, adinez nagusia bada eta jaiotzaren lekuko izan bada. Besteak beste, honako pertsona hauek eska ezakete inskribapena: ospitaleko, klinikako eta erakunde sanitarioko zuzendaritzak, erditzean egon den sendagile edo sanitarioak, baldin eta erditzea erakunde sanitario batetik kanpo izan bada. Horretarako, honako baldintza hauetako bat bete behar da:

• Gurasoak ezkonduta egotea, eta horietako bat, gutxienez, espainiarra izatea. 
• Gurasoak ezkonduta ez badaude gurasotasuna amari bakarrik esleitzea; edo aita biologikoa bertan izanda eskaera bi gurasoek sinatzea.
• Gurasoak atzerritarrak izatea eta biak naziokotasun berdina izatea. 

Jaiotza-inskripzioa ezin izango da ospitaletik telematikoki egin hurrengo kasuetan:

• Ezkontzazko aitatasunari buruzko presuntzioa bertan behera uzten denean.
• Gurasoetako bat adingabea bada edo judizialki ezgaia bada.
• Ezkontzatik kanpoko jaiotzetan, aita ez badago, edo gurasoetako bat edo biak hilda badaude edo ezgaiak badira.
• Gurasoak atzerritarrak badira eta bakoitzak nazionalitate ezberdina badu.
• Amak gurasotasunari uko egiten badio.

Inskripzioa Erregistro Zibilean edo Bake Epaitegian egiten baduzu, bi aukera daude:

- Jaiotza gertatu den udalerrian inskribatzen baduzu:

• Gurasoak ezkonduta badaude: izapidea aitak, amak, gertueneko senideak edo, hala behar izanez gero, jaiotza-lekuan izan den edozein adin nagusiak egin dezake.
• Gurasoak ezkonduta ez badaude: izapidea elkarrekin egin behar dute bi gurasoek.
• Gurasoak adin txikikoak badira: izapidea bi gurasoek egin beharko dute, beren legezko tutoreekin batera.

- Bi gurasoak erroldatuta dauden udalerrian erregistratu nahi bada, izapidea elkarrekin egin beharko da.

Noiz eta non eskatu

Haurra jaiotzen denetik 72 ordu dituzu jaiotza-inskripzioa ospitaletik egiteko.

Ospitalean egiterik izan ez baduzu, hamar eguneko epea daukazu Erregistro Zibilean edo Bake Epaitegian jaiotza inskribatzeko. Epea 30 egunera arte luzatu daiteke, baldin eta bidezko arrazoiren bat egiaztatzen baduzu.

Ospitalean edo haurra jaio den edo bi gurasoak erroldatuta zaudeten udalerriko Erregistro Zibilean edo Bake Epaitegian eskatu ahal duzu. 

Aurrez aurre joan behar baduzu Erregistro Zibil batera hitzordua eska dezakezu:

• JustiziaEus-en Aurretiko Hitzorduaren Zerbitzuaren bidez
• Aurrez aurre, Erregistro Zibilaren bulego nagusiren batean.

Informazio gehiago telefonoz edo horretarako prestatutako posta elektronikoaren bidez jaso dezakezu. JustiziaEus-en eskura dituzu Euskadiko Erregistro Zibileko Bulego Orokorretako eta Erregistro Zibileko Bulego Laguntzaileetako (Bake Epaitegiak) harremanetarako datuak.

Informazio gehiago

Nola erantzuten dizugu

Inskripzioa ospitaletik egiten baduzu, egiaztagiri bat emango dizute, eta ondoren, posta arrunt bidez edo posta elektronikoz jaiotza-ziurtagiria jasoko duzu. 

Inskripzioa Erregistro Zibilean edo Bake Epaitegian egiten baduzue jaiotza-ziurtagiria emango dizute.

Akats posibleak zuzentzea

Jaiotza erregistratu ondoren jaiotza-ziurtagirian akatsen bat dagoela antzematen baduzu, jaiotza inskribatu duzun Erregistro Zibilean akatsa zuzentzeko espedientea abiarazi beharko duzu, eta akats hori egiaztatzen duten dokumentuak aurkeztu beharko dituzu. Izapide hori egin ondoren, Erregistro Zibilak akatsa zuzenduko du eta jaiotza-ziurtagiria eguneratutako datuekin bidaliko dizu.

Izena hautatzeko mugak

Izena aukeratzeko mugak daude. Kontsultatu informazio guztia izen-abizenen atalean.

Kasu bereziak

Epez kanpo inskribatzea

Jaiotza ezin izan bada aurreikusitako epeetan inskribatu (gehienez, jaio ondorengo 30 egunen barruan), bizilekuaren arabera dagokizun Erregistro Zibilean espediente bat izapidetu beharko duzu. Espedientea egiteko eta pertsona legez existitzen dela erakusteko dokumentu hauek aurkeztu beharko dituzu:

• Jaioberri bat inskribatu nahi baduzu
  1. Mediku-ziurtagiria.
  2. Haur hori existitzen dela eta toki eta data horretan jaio dela ziurtatzen duten dokumentuak (NANaren fotokopia, bataio-ziurtagiria, errolda-ziurtagiria eta abar).
  3. Haurra adierazitako egunean eta orduan jaio zela berretsiko duten bi lekuko.
• Gainerako kasuetan
  1. Auzitegi-mediku batek emandako mediku-ziurtagiria.
  2. Pertsona hori existitzen dela eta toki eta data horretan jaio dela ziurtatzen duten dokumentuak (NANaren fotokopia, bataio-ziurtagiria, errolda-ziurtagiria eta abar).
  3. Pertsona hori adierazitako egunean eta orduan jaio zela berretsiko duten bi lekuko.
  4. Neba-arreben eta, ezkontidea izanez gero, horien baimen sinatua, pertsona hori haien neba, arreba edo ezkontide gisa aitortzearekin bat datozela berretsiz. Erregistro Zibila senide horiekin harremanetan jarriko da, pertsonalki edo exhortoen bidez, baimen sinatua lortzeko.

Inskripzioa, nazioarteko adopzioetan

Atzerriko haurra adoptatu baduzue, jaiotza-inskripzioa egin eta orri-bazterrean nazioarteko adopzioa dela jasotzen duen oharra jarri behar da. Aurrez aurreko izapidea da eta adoptatzen duen norbanako edo bikotearen bizilekuari dagokion Erregistro Zibilean egin behar da. Adoptatutako pertsonak inskribapena eska dezake ere, adinez nagusia bada edo emantzipatuta badago.

Prozedura hurrengoa da: lehendabizi inskripzio biologikoa egiten da eta orri-bazterrean nazioarteko adopzioa dela jasotzen duen oharra idazten da. Ondoren, inskripzio biologikoa ezeztatu eta adopzioa inskribatzen da (horrela, adingabearen pribatutasuna babesten da).

Izapidea egiteko, Erregistro zibilera joan eta inprimakia eskatu behar da. Horren ostean, bikotea bazarete, biak joan beharko duzue dokumentazioa eramatera eta sinatzera. Une horretan, jaiolekutzat gurasoaren/gurasoen egoitza edo haurraren jaioterria jarri behar da. Adoptatutako haurraren izena aldatu daiteke ere. Zenbait kasutan izena adopzio-epaian jasota dago, beste batzuetan, berriz, epaitegian eska daiteke.

Dokumentazio guztia eraman ostean, Erregistro Zibilera berriz itzuli beharra dago, inskripzioaren datu guztiak zuzenak direla egiaztatzeko. Orduan, gurasoetako bat joatea nahikoa da. Guztia zuzen badago, adopzioaren inskripzioa jaso daiteke.

Nazioarteko inskripzioa egiteko hurrengo dokumentazioa aurkeztu behar da:

1. Adoptatuko duen norbanakoaren/norbanakoen NANaren fotokopia.
2. Erroldatze ziurtagiria.
3. Egokitasuneko ziurtagiria.
4. Adopzio epaia, itzulia eta legeztatua.
5. Adingabearen jaiotza-ziurtagiria, datu biologikoduna, legeztatua eta itzulia (Dagokion Atzerriko Erregistro Zibilaren jaiotza-ziurtagiria, legeztatua, edo apostillarekin eta Espainiako hizkuntza ofizialetan ez badator, zinpeko itzultzaileak itzulita egon behar du).
6. Adingabearen jaiotza-ziurtagiria, adopzio autoekin, legeztatua eta itzulia.
7. Adopziogilearen edo adopziogileen hitzez hitzeko jaiotza-ziurtagiria.
8. Gurasoen hitzez hitzeko ezkontza ziurtagiria (baldin badago)
9. Datu biologikoen aitortza-orria eta adopzio datuen aitortza-orria (bi inprimaki hauek erregistro zibilean ematen dituzte).

Izen-ematea, emakume-bikoteek laguntza bidezko giza ugalketaren kasuan

Lesbiana-bikotea bazarete eta lagundutako giza-ugalketa prozesu bidez jaiotako seme edo alaba Erregistro Zibilean inskribatu nahi baduzue, Eusko Jaurlaritzako Justizia eta Giza Eskubideko Sailaren informazioa irakurtzea gomendatzen dizuegu: Berdindu . Hori bai, aintzat har ezazue ezkontzaz kanpoko seme-alabatasuna zehazteko ez dela beharrezkoa ama ezkonduta egotea edo haurdun egon ez denak ondoren adoptatzea. 

Ohiko galderak

Jaiotza-inskripzioei buruzko ohiko zalantzak jaso ditugu Ohiko galderak atalean.