Berdintasun, Jostizia eta Gizarte Politiketako Sailak 250.000 eurorekin diruztatuko ditu 2023ko udalen eta gainerako tokiko erakundeen bizikidetzari eta giza eskubideei buruzko proiektuak.
Gobernu-kontseiluak gizartean bizikidetza, giza eskubideen errespetua, enpatia eta elkartasuna sustatzea helburu duen dirulaguntzen deialdi hau baimendu du.
Balio horiek sustatzeko, Eusko Jaurlaritzak beste 900.000 euroko laguntza-lerro bat onartu zuen aurreko asteko bileran, kasu horretan pertsona juridikoek aurkeztutako irabazi-asmorik gabeko proiektu pribatuei zuzenduta. Eusko Jaurlaritzak guztira 1.150.000 euro bideratuko ditu bizikidetzari eta giza eskubideen errespetuari buruzko proiektuak sustatzera.
Bizikidetzaren eta giza eskubideen esparruan, deialdiak bare-hartzen dituen programen eta ekintzen helburuen artean daude konpromisoa bultzatzea giza duintasunarekin, giza eskubideekin eta batasunezko bizikidetzarekin; baita gizartean indarkeria, terrorismo edo giza eskubideen urraketa orori zilegitasuna kentzen dion kontzientzia kritikoa bultzatzea ere.
Biktimen eta gizartearen arloan, honetara bideratuta daude: terrorismoaren biktimei laguntzeko ekintzak garatzera, motibazio politikodun indarkeriaren testuinguruan giza eskubideen urraketen biktimei laguntzeko ekintzak garatzera, eta biktimen eta gizartearen arteko lotura sustatzen duten programetara; baita bizikidetzaren eraikuntzan biktimek, aurrerapenen eta aurrerabidearen parte-hartzaile gisa, egiten dituzten aportazioetara ere.
Azkenik, dibertsitateari eta elkartasunari dagokionez, barne hartzen dituzte dibertsitatearen kudeaketa egokia, arrazakeriaren, xenofobiaren eta beste gorroto-delitu batzuen prebentzioa bultzatzen dituzten ekintzak; desberdinkeria, bereizkeria, bidegabekeria eta bazterkeria edo marjinazioaren adierazpen larrienen aurrean elkartasuna eta inplikazioa bultzatzen dituzten esperientziak; eta indarkeria, gerrate eta nazioarteko terrorismo era berrien aurreko elkartasunaren, inplikazioaren eta gizarte-mugimenduen bidezko ekintzak.
Erakunde onuradun bakoitzak proiektuko jaso ahalko duen zenbatekorik altuena 15.000 eurokoa izango da.
