Herri askotan dago bake epaitegia eta ez dugu inoiz bertara jotzen. Justizia-jauregia ez duten herri gehienetan (ez direlako auzitegi-barrutiko buru) mota honetako epaitegiak daude. Justizia-administrazioaren konplexutasuna kontuan hartuta, epaitegi hauetan zerbitzu sinplea eskaintzen da; adibidez, bizi- eta egoera-agiriak egiten dira.
Egiaztagiri honen bidez, pertsona bat bizirik dagoela eta dagokion egoera zibila ziurtatzen dira. Hori lortzeko egin behar dena sinplea da: NANarekin dagokizun bake epaitegira joan. Izapide honi buruzko informazio gehiago hemen aurkituko duzu: JustiziaEus-eko Egoitza Judizial Elektronikoaren Bizi-agiriaren ziurtagiriaren atalean
Ziurtagiri horrez gain, honakoa eskatu daiteke:
- Ezkontza zibilaren espedientea.
- Jaiotza-inskripzioak.
- Bake Epaitegiaren egoitza dagoen udalerrian egindako ezkontza-inskripzioak (berdin du elizakoa edo udaletxekoa den).
- Bake Epaitegiaren egoitza dagoen udalerrian gertatutako heriotzen inskripzioak.
- Jaiotza-, ezkontza- eta heriotza-ziurtagiri laburtuak eta hitzez hitzekoak (bai dagokion bake epaitegian inskribatuta daudenak, bai beste batekoak, izan ere, kasu horretan erregistro zibil eta bake epaitegi batzuek beste batzuei eskatzen die).
- Ezkontza-hitzarmenen inskripzioak.
- Jaiotza- edo ezkontza-inskripzioak lekualdatzeko eskaerak.
Bestalde, Bake Epaitegiek 90 €-tik beherako erreklamazioei buruzko gai zibilez arduratzeko eskumena dute, baina gaur egun ez dute eskumenik zigor-arloko prozeduren ebaztean.
Baliteke norbait Bake Epaitegira joan behar izatea hala eskatu zaiolako. Hori gertatzen da beste epaitegi batek komunikazio-egintzaren bat edo eginbideren bat egiteko eskatzen duenean. Eginbide horiek garrantzitsuak izaten dira, eta, horregatik, deitutako pertsona ezin bada agertu beharrezkoa da Bake Epaitegian jakinaraztea.
- Informazio gehiagorako, kontsultatu JustiziaEusen Bake-Epaitegiak atala.