- Horrela, ofiziozko eta guardiako txandako abokatu eta prokuradoreek jasotzen dituzten konpentsazio ekonomikoak eguneratzen dira
- Doako Laguntza Juridikoak 17,6 milioiko partida izango du 2026an Euskadiko Abokatuen Elkargoentzat, eta milioi bat gehiago Prokuradoreen Elkargoentzat
Gobernu Kontseiluak, Justizia eta Giza Eskubideen sailburu María Jesús San Josék proposatuta, abokatuek eta prokuradoreek ematen duten doako laguntza juridikoa —beren egoera ekonomikoagatik onura hori jasotzeko eskubidea duten pertsonei zuzendua— konpentsatzeko moduluak eguneratzea eta % 5,4 handitzea onartu du.
Justiziarako sarbidea ezin da eskubidetzat jo baldin eta dispositiborik ez badago sarbide hori bermatuko diena legean aurreikusitako ekintzak aurrera eramateko baliabide ekonomikorik ez duten pertsonei. Horregatik, administrazioak doako laguntza juridikoa finantzatzen du. Gaur onartutako aginduak modulu ekonomikoak eguneratzen ditu, ofiziozko eta guardiako txandaren bidez laguntza hori ematen duten abokatu eta prokuradoreei konpentsatzeko. Ematen den zerbitzu zehatzaren arabera, ezarritako zenbateko batzuek % 5,4ko igoera izango dute orain, KPIren bilakaeraren arabera. Eguneratze hori uztailaren 1etik aurrera aplikatuko da atzeraeraginez, eta 774.000 euroko partida izango du aurten.
Doako laguntza juridikorako eskubidearen bermeak barnean hartzen du —joan den urtarrilaren 1ean Justiziaren Zerbitzu Publikoaren Eraginkortasunari buruzko 1/2025 Legea indarrean jarri zenetik— Gatazkak Ebazteko Bitarteko Egokien erabilera. Hau da, epaiketara joan aurretik akordio batera iristen saiatzera behartzen du. Horregatik, moduluak oro har eguneratzeaz gain, saihestutako prozedura judizialarekin parekatuko da ‘transakzio estrajudiziala’ deritzona. Hau da, prozedura horren zenbatekoaren % 100arekin konpentsatuko da. Atzera eginez gero, berriz, 200 eurotan finkatu da konpentsatu beharreko zenbatekoa.
Doako Laguntza Juridikorako partida Justizia eta Giza Eskubideen Sailaren 2026rako aurrekontu-proiektuan jasota dago: ofiziozko txandan eta guardiako txandan emandako zerbitzuengatik 17,64 milioi euroko zuzkidura du aurreikusita Euskal Autonomia Erkidegoko Abokatuen Elkargoei konpentsatzeko, eta beste milioi bat gehiago ofiziozko txandan emandako zerbitzuengatik Prokuradoreen Elkargoei konpentsatzeko.
Zerbitzu publiko estrategikoa
Doako laguntza juridikoa zerbitzu publiko estrategikoa da, pertsona kalteberenei justiziarako sarbidea bermatzea eta inor babesik gabe gera ez dadin helburu duena. Horrela, justizia hurbila eta irisgarria sustatzen da zentzu guztietan. Konpentsazio-moduluen eta -oinarrien azken eguneratzea 2023an egin zen, % 14ko igoerarekin. Ordutik, kostu profesionalen igoerak eta espediente-kopuruaren hazkundeak —2.730 gehiago Abokatutzan eta 5.367 gehiago Prokuradoretzan 2023tik 2024ra bitartean— justifikatzen dute onartutako berrikuspena.
